Hat uur dat och waal ins dat uur alles vermiensjelikt? Ich meen doamit dat vieer allerlei leëveloos objecte waal ins miensjelikke karakter egensjappe geaeve. Vuural jong keenger hant doa las vaan. Ee kink dat zich d’r kop an d’r dusj gestoeëte hat zeët daan: ‘Deë sjtomme dusj is ‘t sjtoot’ Hat uur dat noeëts gehad?
Dat wenste inne sjtee voetwurps uur uch aafvroagt of deë zich pieng hat gedoa….. of wentste de zeëg in inne boom zets, haste daan noeets gedach dat deë boom an ’t grieëne is…? Vieer als miensje zunt noen eemoal zoeë. Vieer wille alles ing emotionele belaning geëve.
Ee dusjke vuur vanalles
Ich hou dat lets nog. Bij os in d’r gaat sjteet ee dusjke va waaibomehoot. Zoe klinkt ee, soee sjmaal lank dink. In d’r winkel heesj dat inne ‘sidetable’ inne dusj deë an de zie sjteet. Komisch is dat egelik, inne dusj deë me an ing zie zet. Went ich get aggen zie zet daan wil ich doa effe nieks mit. Mar good, wie ich dat dusjke, lets wie vier ee kling fes houwe heenge in d’r gaat, zoog sjtoa dach ich, ‘Dat dusjke hat al gans get mitgemakt in al die joare dat vieer dat hant’ ’t Begos allemoal als afzetdusjke in d’r gank, doanoa woeët ’t bij de familiefeste gebroekt als dusjke woa-op d’r wieen sjtong. ’t Woar beerdusj, sjpieëldusj, blommedusj, kotum dat dusjke hat ongeveer alle kamers iggen hoes gezieë. Vieer hant och als ins d’r krissjtaal d’rop gezat. En ’t hat och ee paar joar in d’r sjtaal gesjtange, Dizze zoeemer woar ‘t ee plantedusjke in d’r gaat. Mit ee paar flinke blompöt d’rop woain vieer tomate hant getrokke.
Al mieë wie 25 joar oad
Wie vieer dat dusjke aagesjaft hant ee joar of 20 geleie, woar dat eglik gans modern. Ich weet ’t nog, ’t woar op inne zoaterdig. Sjun sjtieef in d’r lak, grenehoot naturel. Mit van die gedrieënde puuët. En doa woar och nog zoe hendig kling sjoat in um get klinge prul in kwiet te weëde. Deë dusj houwe vier als bouwpakket gegole. Nou ja, bouwpakket…. Doa hoovete alling mar mit 4 vluugelmore de puuët an ’t blaad vasgemakt te weëde en dat woar och vuur mich als hobbyist mit twieë linkerheng ging onuuverkomelikheed.
Sjun deenger d’rop
Mar good, ’t dusjke sjtong, en ’t woeët in d’r gank teëge de moer en neëve de duur noa de gouw kamer gezat. D’r gank zoog al direk get aagekleider oeet. Mar noen moeëte och get deenger d’rop en d’rin gezat weëde. D’rop vuur ’t oog en d’rin, van deë klinge prul deëste nog nit wils voetwerpe. Vuur d’rop houwe vier ee ‘kunstwerk’ gegole. Dat besjtong oeet twiee nogal sjwoar maskers van giepsbetong. Geëlig broeen va kluur. Mit ee sjtuk vlechtieezer dat och in d’r bouw weët gebroekt woare die vastgemakt op inne hoave sjtroatesjtee. ‘ t Ee woar get hoeëger daan ’t anger en ’t sjtellet ee lachend en ee grieenend masker vuur. Bij os heesj dat inne Grieënlächer. Die twieë bildjes sjtonge rechts van ’t midde en an de aangezie loog ee sjun gehoakt klidje en doa sjtong ing sjoal op. Richtig sjtolz woare vier op ozze gank mit ‘sidetable’ en kunstwerke d’rop. Mar erg lang hat die sjpass toen nit gedoeert. Dat koam zoee….
Inne klinge sjwieps
Ozze uitste zoeën, d’r Tom, sjtudeeret toen in Tilburg en woar toevallig dat weekend ins op heem aagekoame en daan trof heë zich mit vrung van vreuger. Die troffe zich daan bij d’r ‘Bijs’ in Heële en onger ’t genot va de nuuedige pötjes beer, pindanuuët en bitterböl woeëte daan de probleme van de welt besjproake, wietse verteld en veuël onzin d’roeetgekroamd. ’t Koët daan och zoemar gebure dat d’r inne of d’r angere inne klinge ‘sjwieeps’ kreeg en nog later dat de tong get diek woeët. Uur kent dat waal. Ja, en deë jong van os deë woar och nit va gister deë deeg doa loestig aa mit. En zoeë gebuuret ’t dat heë juus op die nach, op deë bewuste zoaterdig, good onge de kaar woar gekoame. En wie dat zoe is bij sjtudente, die geëve ’t geld leever oeet an beer als wie an inne taxi. Deë um twieë oeer s’nachts te voot noa heem. Doa aagekoame duiet heë noa ee paar moal probere d’r sjluuetel in ’t sjluuetelloak, drieënet deë um en maket de duur oape. Sjtil wool heë in d’r duuster erop goa noa zieng kamer, gee leeg aamake um ginne wakker te make… Mar wat deë nit wos woar dat vieer doa ’s middigs dat dusjke mit die bilder teëge de moer gezat houwe….. Ja en daan kinste waal roane wat doa gebuuet is……
Ravaasj in d’r gank
’t woar zoeget hoaf drei in de nach wie ich hoeët dat d’r sjluuetel in ’t sjluuetelloak woeët gesjoave en de duur oapegong. Deë is och eheem dach ich nog en ich drieënet mich um. Ich houw d’r kop nog nit op ’t kusse ligke wie ’t begos…
Opins inne sjlaag… Nog inne sjlaag, noe mit gevlook… Ee sjandaal dat dat woar. Ich zoot wie inne blitz rechop igge bed, sjprong droeet, rennet in de ongerboks de trap eraaf en zoog doa d’r jong deë tusje d’r umgevalle dusj en de bilder mit lodderige oge um zich hin zoot te kieke. Deë sjnapet doa nieks va. Wie heë deë middig voetgong sjtong dat dusjke nog ga nit doa! Heë proberet nog d’r kroam wer teruuk te zette, maar dat lukket nit. ’t Vool um wer oeët de heng.
Murge kalle vieër wieër
Ich houw direc gesjoate dat deë ee sjtuk in de vaan houw en heë woar och nog noa de sjwoarmaboeed geweë en dat zurgete vuur ing lof woavaan ich zelf bau uuver d’r nak gong. Mit iggehoate woeet zag ich: ‘Mak dich erop en murge kalle vieer wieër’. Deë de trap erop, en wieër noa d’r zulder, woa zieng kamer woar. Mar vuurdat deë gans boave woar, reep ich em teruuk. ‘Eraaf en ieetsj de teng poetse!’ Wie zoeë dom sjoap koam heë eraaf en trok zich teruuk op de badkamer.
D’r dusj is sjun gedekt
Zondigmurge, 8 oer. Ich woeët wakker van inne kakefonie aan geluide onge vanoet de kuuëke. De lof van gebakke bruudjes, sjpek en kaffie sjteeg umhoeëg. Ich keek ins neëve mich, mar mie Paula loog nog doa; zich van gee koad bewus ruiïg te sjloape. Weë woar dao an de gang? Ich trok mich d’r bademantel aa en leep noa onge. En doa sjtong heë zich oet te sjlove d’r kloeët. D’r dusj sjun gedekt, ing dusjdekke en ee blumke d’rop. D’r wedgewood oeëtgeholt en heë sjtong an de forneus eier te bakke. ‘Wat bis du an ’t doeë?’, vroog ich nog ummer koad van wat die nach gebueet woar. ‘Ich geleuf dat ich get good te make han’, zag d’r jong. Heë drieënet zich um en keek mich mit inne redelijk durchgezoape dieke kop aa. Mar um ziene monk zoog ich inne glimlach. Ja en daan sjmiltste… Ich zoog dat heë zich sjuldig volt en dat heë ’t good wool make… En mit zoe heerlik ontbijt houw heë de juuste sjnaar gerakt….. Ich koeët geweun nit mie koad zie.
En onwillekeurig dach ich teruuk an die kieër dat ich och ins heem woar gekoame mit get veul alcohol igge lieef en ich och de mieng gerieëte houw……. Mar dat vertel ich uch ing anger kieër.
Over de schrijver
