Wirk in d’r gaat: graas aafdoeë

In Landgraaf, Parkstad Plat door FaBePlaats een reactie

Graas Aafdoeë

Wenste inne gaat has, witste dat doa aaf en tou get in mót gebure. In d’r drek buttele en sjoefele, onkroeet d’roet hoale, de hek sjere en plentjes plante. Ee van de belangrieekste ongerdele is um ’t graas good te verzurge, te verwenne en regelmatig aaf te doeë. Mar soms is ieëlend in d’r gaat.

inParkStad Advertentie

Noeëts mieë buxus

’t Is nit alling ’t graas dat good geet mit dat bruijerig weer van dees daag. De conifere tusje mich en d’r buurmaan knalle alle kante oeeet. Doa kom ich al ga nit mieë aa. Die zunt inne meeter of vieef hoeëg. Doa mot dus inne hovenier vuur kome. Onkroeet kinste gidder daag oeettrekke. En daan d’r buxus. Inne ramp hat zich dit joar voltrokke. En deë woar zoe sjun. In plaatsj van ee paar sjun greun en golvende heksjkes en get buxusbölkes is ’t noen ing kluurloze broen en verdorde hek. Twieë kieër han ich gesjpoate, effe gong ’t good mar oeeteindelik han ich verlore van die honderde kling rupse die mich alles hant kaalgevreëte. Noen geet d’r buxus in d’r ganse gaat ram d’roet. Wat d’rvuur in de plaatsj kunt weet ich nog nit, Wat ich waal weet is: noeëts mieë buxus.

Twieë kieër per weëk graasmieëne

’t Weer wit de letste paar weëke och nit richtig wat ’t mot. D’r inne daag reënt ’t en d’rangere daag brent de zon en daan is ’t wer inne bewolkte mar drüege daag. Good weer vuur d’r gaat. De vurrige weëk wie ’t gereëgent houw han ich nog gauw get extra kunstmes mit ónkroedverdelger uuver ’t graas gesjtruijt. Dat hat ’t good gedoa. ‘t Graas gruijt get flotter, en ’t ónkroeët lieët ’t wer vuur ee paar weëke aafwete. Noadeel is waal, dat ich noen ’t graas twieë kieër per weëk mot mieëne. Alling al dat mieëne doeert ing dieke sjtond. Daan han ich nog ging rendjes gedoa, mar gelukkig hooft dat nit zoe duks.

Sjun weer, naat graas

D’r weermaan hat gemeld dat noen, de letste daag van de vakans, nog ee paar hete daag aakome. 28 graad weët ’t en kans op ing bui. ’t Geet dus erg benauwd weëde. Dat betekent dat ’t graas dizze murge pratsj naat is van d’r dauw en um daan graas aaf te doeë is alling mar ieëlend. ’t Bliet uuveraal plekke, d’r graasmasjieng lupt vas en d’r container weët loeëtsjwoar doadurg. Sjun weer en naat graas doa han ich nieks mit. Ich môt geweun wade bis d’r middig went ’t graas wer druueg is.

’t Geet beginne

’t is zoewieet. Ich kin goa beginne. Daan geet d’r tillefoon. Ozze Tom belt of heë mit d’r twieëling langs kin kome daan kinne die get renne en ravotte in d’r gaat. Daan zeëste natuurlik nit ‘neae’ en zoe gebuurt ’t dat ee hoaf sjtundje later d’r Ilja en d’r Noah de oprit kome aafgerend en noa d’r gaat in duike. ’t Sjpieëlgood weët oeet ’t prieel gehold en d’r gaat is noen de sjpieëlplek. Mar ’t graas môt aaf. Ich begin vure. Graasmasjieng, afvaalcontainer en verlengsnjoare weëder kloargemakt. En daan begint ’t. Sjun in vaste bane, diagonaal uuver ’t graas. D’r twieëling vingt dat hartsjtikke interessant zoene lopende graasmasjieng. Ze wille och graas aafdoeë.

Mithelpe

Wie ze juus koeëte lope hant vieër d’r Ilja en d’r Noah alletwieë ee sjpieëlgood graasmajsientje gegole. Doa hant ze get mit ronkgerend en nog uumer weët doamit gesjpild. Mar huu is dat veuel interessanter. Ziëker went d’r opa mit d’r groeëte electrische graasmasjieng an de gang is. ‘Vieër wille och graas aafdoeë, vieër wille mithelpe’ Ze pakke hunne ege ‘graasmasjieng’ duije op get knuupkes en dunt alsof ’t masjientje begint te lope. En daan mit d’r opa mitlope inne links en inne rechts. ’t Graas aafdoeë hat deë daag get langer gedoert, mar ’t woar ing sjpass um mit te make. En wie vieër kloar woare en alles wer sjun woar opgeruumd vroage ze: ‘Opa, wienieë gunt vieër wer graas aafdoeë?’

Over de schrijver

FaBe

Dialectschrijver van verhalen met een glimlach over herkenbare, alledaagse belevenissen en gebeurtenissen.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.