Bourgondisch genete

In Landgraaf, Parkstad Plat door FaBePlaats een reactie

Dizze zoeemer is van os. Dat wil zage ee paar weëke ee gans anger programma dan vieër gewend zunt. Effe nit gidder murge um hoaf zieëve opsjtoa, nit op de lijn passe, mar geweun ee lekker sjtuk vlaam bij d’r kaffe tusjedurch. En wat te dinke van inne heerlikke lunch op ee zonuuvergoate terras urgens in ’t heuvelland. Vieër gont Bourgondisch genete en loate ’t os ee paar weëke good goa.

inParkStad Advertentie

Nit op vakans en toch genete

Dit joar ging lang vakans in ’t boeeteland, mar geweun genete in d’r ege gaat. ’t Hoeeshouwe is teruukgebrach tot ’t minimum en vieër bedinke os get sjun oeetsjtepkes. Ee paar daag Amsterdam noa ozze zoeën, ee weekendje noa ozze wieenboer in de Pfalz, Oake is och ing sjun sjtadt um inne daag um te kriege, vieër sjnoeve get cultuur in ee museum, gont noa ee leuk concert van ’t WMC en ’t Orlandofestival, bezeuke vuursjtellinge van Cultura Nova, en leëze get gouw beuker. En went ’t mich oeetkunt breëk ich misjien och nog ing ouw moeerkas oeet ing van de sjloapkamers en knap ich die ganse kamer op.

Ontbijt

Och in d’r zoeëmer weët gegeëte. Och daan mot d’r inwendige meinsj natuurlik giddere daag good verzurgd weëde. ’t Wiekt daan waal behuurlik aaf van de gebroekelikke moaltiede. ’s Murgens dunt vieër ’t kalm aa. Frisje bruuedjes hoale bij d’r werme bekker, ee paar appelsieene peësje en daan lekker mit de sjuufdure van d’r winktergaat wiet oape genete. De krant neëve d’r telder en ing tas sjterke kaffe iggen heng. Wat wilste nog mieë.

Lunch

En daan d’r lunch. Dat is ummer ing verrassing. ’t Is óf lunch óf aovendeëte, nit allebei. Vieër hant os de Limburgse terrasgids aagesjaft en gidder weëk zeuke vieër ee sjun terras oeet en loate os doa verrasse en verwenne. Doa zunt al ee paar sjun lunchterasse vuurbijgekoame mar vieër hant d’r nog ee paar tegood.

Barbekjoe

Op gouw daag went de zon sjun sjient, weët d’r barbekjoe eroet gehold. Ee good sjtuk vleesj en get lekkere vusj vorme daan ’t hoofdsjôttel. Doa umhin get eëplesjlaat, Salades mit heerlik frisj freuitige dressings, en doabij natuurlik lekkere wieen oeet d’r ege kelder of ee good gekeuld Leffe. Went ’t effe geet nuuedige vieër doabij ummer ee paar gouw vrung oeet um same van ’t good leëve te genete.

Oavendeëte

Went vieër inne oeetgebreide lunch hand gehad, bliet ’t oavendeëte beperkt tot get kieësblöksjkes, druëgwoeësj, get komkommer en kling sjnuutstomate. En och doabij sjpilt d’r wieen ing hoofdrol. Mar vieër kinne och intens genete went vieër urgens de veut onger d’r dusj kinne sjuuve. Dat kin same mit vrung zieë in ee good restaurant zoe wie bij d’r Walther i Kirkkroa of d’r Geleinhof i Heële, mar ’t kunt och vuur dat vieër vuur ee paar euro op de tennisbaan in Ubach Paleberg aajsuuve vuur inne sjnitzel mit frite sjlaat en inne hoave liter Kölsch.

Bourgondisch genete

Mit alles d’rop en d’ra. Mit ee good book uuverbrugke vieër de tied. Uuver een sjtundje gon ichzelf an d’r sjlaag. Huu ee lekker biefsjtuksjke mit champignongsaus, gebakke eëpel en get gemengde greunte oeet de wok. Vuuraaf meloen mit sjink en get roeë Port d’ruuver. Mit de amuse mak ich ’t mich huu gemekkelik; ee sjtuksjke toast mit get pesto oeet ee pötje van d’r supermaat. Nog effe daan zit ’t wer d’rop, maar vuur dat ’t zoewiet is blieve vieër Bourgondisch genete.

Over de schrijver

FaBe

Dialectschrijver van verhalen met een glimlach over herkenbare, alledaagse belevenissen en gebeurtenissen.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.