Rock & Roll in ‘t theater

In Landgraaf, Parkstad Plat door FaBePlaats een reactie

In Landgraaf sjteet an d’r Ouwe maat in Woabig ee kling intiem en gezellig theater. Doa ligkt ee prachtig oad kirkgebouw dat an ‘t eind van de 80-ger joare is umgebouwd noa dat wat ’t noen is: ‘Theater Landgraaf’. Boave de duur sjteet in inne blauwe Naamse sjtee ’t joartal 1818. ’t Kirksjke hat ma zoeng zestig joar als kirk gefunctioneerd.

inParkStad Advertentie

Van kirk noa theater

’t kirksjke kint ing sjun, en biezonger historie. Noa de joare van devotie hat ’t gebouw bis noen tou ee sjtuk of vieëf versjillende leëves gehad. Ieëtsj sjtong ’t ee paar joar te verpietere en sjloog ’t verval tou. Inne boer zoog toen nog ing groeëte sjuur d’rin en heë sjloog doa ’t hui en de karoeëte op. Later woar ’t och nog ee paar joar in gebroeek als patronaat van ’t durp. Wie in 1946 inne brank oeetbrook leek ’t einde van dit biezonger gebouw doa te zieë. Alling d’r toere en ee paar sjwatte moere sjtonge nog rechop. Toch zoog nog ieëmes broeëd in dat gebouw. ’t Gebouw woeët gans opgeknapt en iggerich als schrienerij. Ee paar joar later woeët ’t egedom van de geminde die ’t kirksjke gebroekde als parkeerplaatsj vuur d’r Brandweerauto. Later woeët ’t och nog opsjlaag- en reparatieplaatsj vuur ’t wagepark van de geminde. En noa de herindeling van 1982 vervool och die functie en sjtong ’t gebbouw wer ee paar joar leëg. En toen koam inne op ’t lumineuze idee um van dat gebouw mit die prachtige oeetsjtraling ee theater te make. En noen 35 joar later sjteet doa ee oad historisch gebouw, iggerich als ee intiem en sfeervol theater woa gidder joar prachtige vuursjtellinge uuver de bühne rolle.

Ing ege theatersjoeël

An ’t theater, dat gedrieëve weët durch vrijwilligers, is och ing theatersjoeël verbonge woa keenger van alle leëftiede kinnis make mit ’t theater mar vuural och zelf lieëre um te actere. Gidder joar sjleete de groepe van de theatersjoeël ’t theaterseizoen aaf mit aparte vuursjtellinge. Dat is sjpannend want noen treëne ze ech op vuur publiek in inne oetverkochte zaal. Ee fes um te zieë en mit te make. In de oudste groepe zitte jong volwasse luu die al gans get in hunne marsj hant. Nit alling actere, och zeenge en danse lieëre ze doa. En dat betekent dat ze complete musicals opveure. Zoeë och dit jaor.

Rock & Roll

Huu weët d’r weltbekinde musical ‘Grease’ opgeveurd. Ee gans joar lank hat d’r musicalgroep mit veuel sjpass en inzet an dizze heerlik romantsiche jongermusical gewirkt. Prachtige en weltbekinde leedjes en sjun oeetgewirkte denskes. Ze vertelle, zeenge en danse ’t verhoal van hun Higheschool. En wie! De sjpas en ’t plezeer sjpettere d’r vanaaf. Van begin tot einde boeie ze ’t publiek in d’r oeetverkochte zaal. Lich, geluid en decor zunt perfect aafgesjteld. Petticoat en cadillac breenge os teruuk noa os ege jongeretied, de tied van rock & roll, d’r Kreidler, d’r Puch en d’r Zündap. Ee genot um mit te make.

Einde seizoen

Mit de vuursjtellinge van de ege theatersjoeel zit ’t seizoen vuur ’t theater wer d’rop. En noen brikt de tied aa vuur de jonge van d’r bouwploog, en d’r techniek, de vrijwilligers van de horeaca-afdeling en van kantoeër um wer alles in gereedheet te breenge vuur ’t volgend seizoen. Poetse, kling reparaties, lich- en geluidsapparatuur revisere, lampe vervange, opruume, kotum went ’t in d’r september wer begint, sjteet Theater Landgraaf kloar vuur ee nui seizoen van sjpannende vuurstellinge mit moeziek, toneel, cabaret, dans, literatuur en wat zoeë nog mieë vuurbijkunt. En weë wit och volgend jaor wer Rock & Roll in ’t theater….!

Over de schrijver

FaBe

Dialectschrijver van verhalen met een glimlach over herkenbare, alledaagse belevenissen en gebeurtenissen.

 

Reageer

Deze website gebruikt Akismet om spam te verminderen. Bekijk hoe je reactie-gegevens worden verwerkt.