Vrijwilligersdaag

In Parkstad Plat door FaBe3 Reacties

Vrijilligers vingste allewiel ummer minder en wenste ze has, daan moste die aaf en tou och ins in de watte legke. Mar dat is nog nit zoe gemekkelik. ’t Maag nit teveul koste en dat is vuur de organisatore gidder joar wer ing richtige oeetdaging. Op zoene daag kunste mit de gekste deenger in aaraking. Vurrig joar woare vieër in Wienandsroa noa ing manege geweës. Ing aparte ervaring mot ich zage. Zieëker wenste nog noeëts op zoe groeët deer has gezeëte. Man, wat zunt die peëder groeët. Soms zaan ich al teëge inne groeëte honk dat, dat ee peëd is, zoeveul respect en angst han ich vuur dere. Mar good, vuur dit joar woare wer twieë anger vrijwilligers aagewieëze die get moeëte vuurbereide en dat loog get mieë in mie sjtröätje.

inParkStad Advertentie

Nonke Buusjke

Gidderinne hei in de regio hat ongetwieefeld waal ins gehoeët van ’t Nonke Buusjke in de busje van  Sjinveld. ’t Is ing verzameling van Limburgse vakwerkhuuskes en wirkplaatsje van zoeng 100 joar geleie. Allemoal mit historisch materiaal iggericht. Dink daobij an ouw meubele en gesjieër,  mar och an ing verzameling lankbouwwirktuuge van ronk 1900.  Doe vings doa och ee richtig bakkes woa gidder weëk frisje vlaam weët gebakke, ing zeemsjtokerij, ing klompemakerij en nog veuel mieë.

Op d’r fiets

Vurrige weëk woare vieër doa op bezeuk mit de vrijwilligers van ozze verrein. ’t Woar ozze joarlikse vrijwilligersdaag en daan weët same get leuks gedoa. En dit joar houwe de organisatore zich bedach dat vieër mit z’n alle noa ’t Nonke Buusjke zouwe goa. Vieër zouwe op d’r fiets goa. Nit sjnak-sjnoor d’rhin mar langs in toeristische route. Mar umdat ich ginne fietser bin, sjterker nog ich han ga ginne fiets,  houw ich mich aageboane als chauffeur um de get ouwer luu die nit kinne fietse noa Sjinveld te vare. Op de verzamelplaatsj bij ’t verreinslokaal sjtonge ze al te wade. D’r fietskloep woar al ing dieke hoaf sjtond ieëder vertrokke.

Werme vlaam

Vuurdatste bij ’t Nonke Buusjke bis moste ieëtsj nog ee sjtuk langs d’r busj uuver inne veldweg en went ’t druueg is, kin ’t doa nog waal ins good sjtubbe. Nit good vuur de longe. Aagekoame op de plaatsj van besjtumming sjtonge de luu van d’r fietskloep al te wade en noen wie vieër allenuij bijee woare kos d’r middig och ech beginne. Vieër woeëte direc noa lang dusje gedekt mit ee roeë-wit geblokt dusjkleed gedirigeerd. Ieëtsj zitte en doanoa moch gidderinne zich ing tas kaffie mit ee sjtuk vlaam goa hoale. Deë vlaam woar nog deëzelfde murge in ’t bakhoes gebakke. Rieestevlaam, Appelvlaam, Kroeësjlevlaam, Linzetoeët, Abrikoeëze- en kieësjevlaam. ’t Ganse pakket woar besjikbaar. En oeet giddere vlaam woeëte – zoeë wie dat huuet – ach sjtukker gesjneie. D’r vlaam woar nog werm, frisjer geet nit. ’t Woar heerlik genete. Noa d’r kaffie en d’r vlaam begos de ‘excursie’ In kling gruupkes woeëte vieër durch ’t museum geveurd, begeleid durch inne vrijwilliger van ’t Nonke  Buusjke.

‘t Buffet

Ee paar sjtond later, teruuk in ’t verreinslokaal sjtong os ing nuij verrassing te wade. Sjun opgemakde dusje mit ee blumke en ee keëtske sjtong gereed. D’r wieët woar kloar um de tap en de flesj oape te trekke en op de bühne woar de moeziek zich an ’t vuurbereide. Langzaam leep d’r zaal vol en kos ’t fes beginne. En toen, toen koam ’t buffet. Werm en koad, vleesj en vusj, greunte en sjlaa, kippepuët en gevulde eier, kouw sjottel en nog mieë lekker hepkes. De sjtimmung zoot good d’rin en vlot gonge de bintjes de loch in. En ee paar glazer beer of wieën wieër durfde ee paar vrijwilligers ’t soegaar aa  um inne act oeet te veure. ’t Woar inne prachtige daag en os vrijwilligers die hant wer zin d’rin.

Foto: Nonke Buusjke

Over de schrijver

FaBe

Dialectschrijver van verhalen met een glimlach over herkenbare, alledaagse belevenissen en gebeurtenissen.

3 reacties op “Vrijwilligersdaag”

  1. Doa sjteet waal inne fiets bij os in de garage en ich gebroeek dem soms, mar dat is nit miene fiets….!

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.