’t Circus van de zon

In Landgraaf, Parkstad Plat door FaBePlaats een reactie

’t Woar al joare inne wunsj van mich um ins noa ing vuursjtelling van Cirque du Soleil te goa. Gee geweun circus zoee wie vieër dat kinne, mar ing mengeling van circus, theater, dans, show en vuural och éé groeët thematisch sjpektakel.  Kluurrieeke kostuums, acrobatiek van weltklasse, sjtunts zoeë wieste ze zelde kins zieë en natuurlik originele live-moeziek. Dat alles verpakt in inne non-sjtop wervelende show. Gee geweun circus, mar circus-theater.

inParkStad Advertentie

D’r Ziggo-Dome

Eindelik is ‘t zoewiet. Vieër gunt noa Amsterdam um de nuiste show te zieë en te beleëve. ‘Varekai’ zoee heesj de vuursjtelling. Ing ode aan de zieël van nomade zoee wie de zigeuners. De vuursjtelling weët oeetgeveurd in d’r Ziggo-Dome inne groeëte, sjwatte blok van 90 meter breed en lank en 30 meter hoeëg, deë direk neëve de ‘Arena’ likt. Van boeete is ’t ing enorm groeëte reclamemoer van ee paar honderddoezend ledlempkes.  In d’r zaal zelf is plaatsj vuur zieëvetieëndoezend luu.

De Arena-Towers

Via internet zunt de kate besjtelt en umdat ’t vuur os get biezongesj is, regele vieër och nog ing hoteluuvernachting. Dat is kot in de buuet van d’r Ziggo-Dome. Egelik zunt ’t twieë hotels in ee complex mit twieë hoeëg toereflets. ’t Heesj daan och De Arena-Towers. ’t Hotel likt op tieën minute lope van d’r Ziggo Dome aaf en dat is wer sjun mitgenoame. Ging aareesproblme, ging parkeerprobleme nieks van dat alles. Wat vieër waal hant is ing sjun kamer op inne ek mit oeetzich op d’r vuurplei van de Arena en de res van de umgeëving. Vuurdat vieër noa de vuursjtelling gunt loate vieër os in ’t restaurant van ’t hotel nog effe lekker verwenne.

Op noa d’r zaal

’t Is nogal frisj. D’r wink, deë tusje al die hoeëg kantoeer- en bedriefstoerens durchblieëst, makt ’t nog get ongemütlicher, maar dat kan de sjpass van de vuursjtelling die os te wade sjteet nit verpeste. Van alle kante kome de luu aagelope en wie kotter vieër bij d’r igank kome wie drukker ’t weët. D’r plei sjteet vol en toch liekt ’t nit druk. Dat kunt umdat ’t publiek durch waal twintig igeng tegelieek noa binne weët geloate. Binne aagekomae in inne enorme foyer weëde vieër noa ee paar lang roltrappe geleid die os noa d’r twieëde rink motte breenge. Uuveraal zunt igeng noa de tribunes. Alles lupt gesjmieërd. Nurgens hove vieër te wade. Alles lupt wie inne ge-eulde masjieng. Ruum ing hoaf sjtond van tevure zitte vieër op os plaatsje. Langzaam lupt d’r zaal vol. Eindelik weët ’t lich gedempt, de moeziek begint te sjpieële Oeet de coulisse die lieeke op inne busj kunt ee kluurriek figuur de bühne op. De show kin beginne.

Varekai

’t Verhoal van ‘Varekai’ begint went inne jong terech kunt in inne vreëme, geheimzinnige busj. Ing welt van onbegrensde en geheim meugelikhede eupent zich vuur hem. Wiet voet in deë onmeëtelikke busj, boave op d’r top van ing vulkaan, ligkt ing biezonger welt. Ing welt woa alles angesj is en woa fantasiewieëzens leëve. Ing welt van onbegrensde meugelikhede en mysteries, magisch en absurd.  Doa uuver geet ‘Varekai’, dat betekent ‘woa daan och’.

Inne wervelende show dompelt os onger in bijna onmeugelikke acrobatische toere. Hoeëg sjweëvend in seërlikke beweëginge durch de loch en daan wer sjpreengend en dansend durch de vulkaan. Soms hant vieër oge te kot. ’t Is uuverweldigend. Noa aafloop wandele vieër, nog sjtil van alle indrukke, teruuk noa os hotel. ’t ‘Circus van de zon’ hat zieng sjpore noageloate.

Over de schrijver

FaBe

Dialectschrijver van verhalen met een glimlach over herkenbare, alledaagse belevenissen en gebeurtenissen.

 

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.