Os Poasjdiner

In Parkstad Plat, Verhalen door FaBePlaats een reactie

Allewiel wete veuel luu gar nit mieë wat mit Poasje gevierd weët. Vuur de kirk is dat egelik ’t grutste fes van ’t joar. Mar doa merskte nog mar wieënig vaan. D’r glazewesjer houw zich aagemeld um op mondig de roete te kome wesje. ‘Dat is 2e Poasjdaag’ zag ich teëge hem. ‘Nou.. en …? Goof heë te kinne, ‘Ich han egelik nieks mit poajse, doa weet ich och nieks vaan, ich wirk geweun op mondig’ en inderdaad op 2e poasjdaag sjtong deë op de ledder.

inParkStad Advertentie

Culinair genete

Mar doa wool ich ’t egelik nit uuver han, want vieër hant ze wer heenge d’r ruk de Poasjdaag van dit joar. Wat ’t weer betruft woar ’t mar nieks, koad en naat. ’t Woar soegaar ee paar graad kouwer wie mit de aafgelope Krismès. En dizzemurge woeët gemeld dat ’t nog get gong vreeze en hei en doa nog sjnei en hagel uuver os hin zou kome. April deed wat heë wil…. Dat bliekt mar wer ins. Vurrige weëk zote vieër nog boete in d’r gaat onger d’r parasol an inne lekkere frisj gekeulde rosé en noen ziet de welt totaal angesj oeet. Mot ich miene oleander wer binnezette? Kin ich de zoeëmerplentjes die ich juus vuur de poasjdaag geholt han al in de gronk zette? Wat eëte vieër mit de Poasjdaag en wem wille vieër doabij han? Allemoal vroage die mich alling mar mieë in verwarring breenge. Feit is dat ich mit die daag de verwerming mar wer ins ee paar graad hoeëger han gezat, want de poasje weët och dit jaor wer culinair iggevuld egaal wie.

Vieër loate os dat nit aafneume

Dit joar hant vier die daag oane keenger en klingkeenger en oane familie gevierd. Dat woar toch waal ee vreëm geveul zieëker wenste dich realiseers dat vieër de afgelope 30 joar ummer familie uuver d’r vloer hant gehad mit de fesdaag, Krismès, Poasje, inne werme zoeëmerdaag, vieër veenge altied waal ing reë um familie, vrung en/of bure oeet te nuudige op ee lekker glaas wieen, ’t eëte of inne oeetgebreide barbecue. Want zag noen zelf, wat is d’r sjunder en gezelliger um oeetgebreid te toafele mit de luu die dich leef zunt. En vieër loate os dat nit aafneume, och nit dit joar.

Genete mit vrung

D’r Tom, ’t Evelien en d’r twieëling woare op weekend noa ee groeët bungalowpark. Vieër hant hem ing doeës mit get gekluurde eier en inne chocolade poasjhaas mitgegoave. Dit joar dus ging versjtopde eier en ee paar anger lekkernije in ozze gaat. En ozze Paul gong noa ’t Brabantse Schijndel woa mit Poasjpop ’t Hollendsj festivalseizoen geeupend woeet. Heë truft doa, wie gidder joar, ummer ee paar vrung die heë urgens angesj mar zelde teëgekunt. En bij os sjtonge de twieë poasjdaag in ’t teke van lekker eëte en genete mit ganse gouw vrung.

Murge maag ’t wer poasje zieë

Op 1e Poasjdaag begoste vieër mit inne barisecco oeet de Pfalz. Dat is inne heerlijk prosecco. Vieër zouwe nit sjwoar mar waal lekker goa toafele. Als amuse houw ich inne gans frisje foreltartaar gemakt vieër dronke doabij inne Pouilly-Fumé 2013 van Chateau de Tracy. Als vuurgerech koam inne ouwerwetse Hollendsje garnalecocktail op d’r dusj. Toen koam ’t hoeëgtepunt, Lamshaas in roeë portsaus mit inne zachte romige zelfgemakde irpelpuree en get greunte. Doabij inne topwieen oeet Hongarije inne Aureus-Villany oeet 2007 van ’t hoees Gere Tamas &Zslot en inne Médoc Chateau-Sanserot-Dupré oeet 2010. Richtige topwiene. Ing sjun kieësplank mit zachte en hel kieëze same mit d’r wieen van ’t hoofdgerecht brach os noa ee paar heerlik zeute zalighede mit espresso en als oeetsjmijter inne zelfgemakde eierlikeur. D’r 2e Poasjdaag woar iggeruumd viuur tapashepkes. Tieën hepkes en ee kuuninklik desert koame vuurbij. ’t Woar alwer ins ontzettend lekker en vieër hant intens genoate van deë culinaire rieekdom en de superwiene doabij. En de keenger, die wete noen dat ze get gemist hant. Vuur mich maag ’t murge wer poasje zieë!

Over de schrijver

FaBe

Dialectschrijver van verhalen met een glimlach over herkenbare, alledaagse belevenissen en gebeurtenissen.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.